ભારતની 18 રાજકીય પાર્ટીઓએ પાંચ વર્ષમાં ચૂંટણી પાછળ સત્તાવાર 6500 કરોડ રૂપિયાનો ખર્ચ કર્યો છે. આ પૈકી એકમાત્ર ભાજપે કુલ ખર્ચના 52.5 ટકા એટલે કે 3400 કરોડ રૂપિયા ખર્ચી નાખ્યા છે. આ ખર્ચ સાત રાષ્ટ્રીય અને 11 પ્રાદેશિક પાર્ટીઓએ કર્યો છે.
2015થી 2020 દરમિયાન દેશમાં યોજાયેલી ચૂંટણીમાં આ ખર્ચ કરવામાં આવ્યો છે. ભારતના ચૂંટણી પંચને સોપવામાં આવેલા રાજકીય પાર્ટીઓના ખર્ચના વાર્ષિક ઓડીટ રિપોર્ટમાં આ આંકડો સામે આવ્યો છે. જોકે આ આંકડો સત્તાવાર છે પરંતુ બિન સત્તાવાર અને નહી નોંધાયેલા ખર્ચના આંકડા મૂળ રકમ કરતા ચાર ગણા હોઇ શકે છે. ફેક્ટ ચેકરના એનાલિસિસ રિપોર્ટમાં જણાવ્યુ છે કે સાત રાષ્ટ્રીય પાર્ટીમાં ભાજપ, કોંગ્રેસ, બીએસપી, એનસીપી, સીપીઆઇ, સીપીએમ અને ટીએમસીનો સમાવેશ થાય છે. જ્યારે પ્રાદેશિક પાર્ટીઓમાં આમ આદમી પાર્ટી, એઆઇએમઆઇએમ, જનતાદળ યુનાઇટેડ, જનતાદળ સેક્યુલર, અકાલી દળ, એઆઇએડીએમકે, ડીએમકે,શિવસેના, લોક જનશક્તિ પાર્ટી, વાઇએસઆર કોંગ્રેસ, તેલંગાણા રાષ્ટ્ર સમિતિ, સમાજવાદી પાર્ટી અને રાષ્ટ્રીય જનતા દળ સામેલ છે.
કુલ ખર્ચના 3600 કરોડ રૂપિયાનો ખર્ચ એકલા ભાજપે કર્યો છે. કોંગ્રેસે કુલ ખર્ચના 21.41 ટકા એટલે કે 1400 કરોડનો ખર્ચ કર્યો છે. દેશની કુલ 18 પાર્ટીઓ પૈકી બે મોટી પાર્ટીઓએ કુલ ખર્ચના 77 ટકા ખર્ચ કર્યો છે.
સમાજવાદી પાર્ટીએ 3.95 ટકા, ડીએમકેએ 3.06 ટકા, વાયએસઆર કોંગ્રેસે 2.17 ટકા, બીએસપીએ 2.04 ટકા, ટીએમસીએ 1.83 ટકાનો ખર્ચ કર્યો છે.