ઈન્ડિયન પ્રીમિયર લીગની મેગા ઓક્શન પહેલા, બે નવી ટીમોએ પોતપોતાના ડ્રાફ્ટ્સ જાહેર કર્યા છે. આ વખતે અમદાવાદ અને લખનઉની ટીમો પહેલીવાર IPLમાં ભાગ લઈ રહી છે, શુક્રવારે બંને ટીમો દ્વારા તેમના ત્રણ ખેલાડીઓની જાહેરાત કરવામાં આવી હતી. લખનઉની ટીમે કેએલ રાહુલને કેપ્ટન બનાવ્યો છે. તે સિવાય માર્ક્સ સ્ટોઇનિસ અને રવિ બિશ્નોઇને પણ ટીમે પસંદ કર્યા હતા.
લખનઉની ટીમે કેએલ રાહુલને 17 કરોડ રૂપિયામા ખરીદ્યો છે. જ્યારે માર્ક્સ સ્ટોઇનિસ 9.2 કરોડ અને રવિ બિશ્નોઇને ચાર કરોડ રૂપિયા મળશે.
IPL 2022માં કુલ દસ ટીમો ભાગ લઈ રહી છે, જૂની આઠ ટીમોને ખેલાડીઓને જાળવી રાખવાની તક મળી છે. જ્યારે અમદાવાદ, લખનઉને મેગા ઓક્શન પહેલા ત્રણ-ત્રણ ખેલાડીઓ ઉમેરવાની તક મળી હતી. હવે જ્યારે તમામ ટીમોએ પોતાના ખેલાડીઓના નામ જાહેર કરી દીધા છે ત્યારે મેગા ઓક્શનનો માર્ગ મોકળો થઈ ગયો છે.
તમને જણાવી દઈએ કે IPL 2022ની મેગા ઓક્શન 12 અને 13 ફેબ્રુઆરીએ બેંગ્લોરમાં યોજાશે. જો કે, ભારતીય ક્રિકેટ બોર્ડે હજુ સુધી હરાજીની તારીખો જાહેર કરી નથી, પરંતુ બોર્ડની નજીકના સૂત્રોએ હરાજીની તારીખો પર મહોર મારી છે.